Cargando imaxes...
Asociación Solfa

Terceira edición dos Cantos de taberna

O próximo sábado 7 de marzo ás 20 horas no Centro social Sagrada Familia na rúa Sagrada Familia nº  26 da Coruña, terá lugar a 3ª edición dos Cantos de taberna onde acompañaremos ás Cantareir@s.comTIGO e mais ao Grupo de Música Tradicional A Rexouba.

En colaboración coa Deputación da Coruña, o Coro da Asociación Cultural e Musical Solfa, dirixida por Francisco Tobar interpretará:

  • Carballos de Carballido (Letra: Eduardo Pondal; Música: Alberte López Porta; Arr: Francisco Tobar)
  • Has de cantar (Letra: Roslía de Castro; Música: Antonio B. Celada)
  • O maio (Letra:Manuel Curros Enríquez; Música: L.E.Batallán; Ar: Plácido Travieso)
  • María Soliña (Letra: Celso Emilio Ferreiro; Música: Antonio Paz Valverde, Arr.: Francisco Tobar)
  • Xota de Lira ( Popular galega; Arr.: Francisco Tobar)

Día de Rosalía de Castro 2020. Ambos errantes polo mundo andamos!

O domingo 23 de febreiro, ás 12:00 horas, terá lugar o acto central do Día de Rosalía, con entrada libre, no Panteón de Galegos Ilustres, en Santiago de Compostela.

Ambos errantes polo mundo andamos, dixo a muller. Daquela, as xentes silenciadas, ás que lle roubaran ata as palabras, recuperaron o alento. Fixérono de golpe. Souberon decontado o que eran, o que somos. Transmatria errante nunha humanidade errante. Seres humanos que vagaron e vagan; que pularon e pulan; que morreron e morren na procura do pan e da liberdade. Logo, a muller aquela, desafiando leis masculinas, sentenciou: Toda a terra é dos homes e das mulleres. Toda a terra.

– Saúda do Presidente da AELG, Cesáreo Sánchez Iglesias.

– Lectura do Manifesto da AELG por Daniel Asorey.

– Lectura de poemas rosalianos

Jakson Renner Rodrigues Soares
María Novoa
Concha de la Fuente
Alexandre Espinosa
Imma António Souto
Miguel Pernas
Marilar Aleixandre
Pilar Astray
Miguel Fariña
Mercedes Queixas

Coral da Asociación cultural e musical Solfa que interpretará:

  • O maio
  • Has de cantar
  • Carballos de Carballido
  • Na morte de Castelao

– Ofrenda floral

– Interpretación do himno

Manifesto da AELG por Daniel_Asorey

Exposición Galiza no mundo

O xoves, 6 de febreiro, ás 17.30h no Museo Centro Gaiás da Cidade da Cultura realizarase unha visita guiada á exposición Galiza no mundo

A exposición ‘Galicia un relato no mundo’ reune 3.000 pezas cun “elevado valor simbólico e que resultan esenciais para comprender a cultura e a identidade galega no marco histórico internacional e que nunca se exhibiron na Galiza”.

Poderáse ver: O libro das Invasións, contemplaremos un dos primeiros mapa mundi enciclopédicos europeos e que representa a Catedral de Santiago como o edificio máis importante de Europa, Conta con dous códices calixtinos, a Santa de Asorey, unha das obras máis relevantes da arte galega…A través da realizade virtual, poderás facer unha viaxe nun trassatlántico da emigración galega a América, …

Toda a información sobre esta importante exposición que organiza a Xunta de Galicia e Fundación Cidade da Cultura en: https://www.cidadedacultura.gal/gl/evento/galicia-un-relato-no-mundo

Visita guiada á Exposición NÓS de onte a hoxe: 100 anos de historia

A A.C. O Galo  e Asociación Cultural e Musical Solfa, convidámosvos a unha visita guiada á Exposición NÓS de onte a hoxe: 100 anos de historia», organizada pola Federación de Asociacións Culturais Galiza Cultura. Con ela conmemórase o centenario dunha iniciativa singular e decisiva na historia contemporánea da Galiza: o nacemento da revista Nós, revista de alta cultura que coloca a lingua, as artes e a ciencia galegas nun nível privilexiado de calidade, e cuxo primeiro número ve a luz o 30 de Outubro de 1920.

A exposición leva como lema: SER DIFERENTE É SER EXISTENTE, e realiza un percurso pola significación e a obra dos seus principais persoeiros: Vicente Risco, Castelao, Ramón Otero Pedraio, Ánxel Casal… con atención especial, e lóxica conexión xeracional, á figura de Ricardo Carvalho Calero, dedicatario do próximo Día das Letras Galegas 2020, testemuña excepcional desta época e estudioso constante da obra do Grupo Nós.

O próximo venres, 10 de xaneiro de 2020, ás 18:00 horas, no Museo do Pobo Galego, onde se encontra a exposición, comezarase coa proxección do audiovisual de 7 minutos, que acompaña e completa os textos. A seguir, o profesor Carlos Bernández, comisario da exposición, fará unha visita guiada, que durará sobre unha hora. 

Concentración: Emerxencia lingüística. Precisamos do galego

A plataforma cidadá Queremos galego, composta por máis de 600 entidades e da que forma parte a Asociación Cultural e Musical Solfa, convoca unha concentracións o xoves 19 de decembro ás 20h na Praza do Toural, “en resposta á situación de emerxencia lingüística que amosan con claridade datos como os do IGE” e para “reclamar que a Xunta cumpra coas demandas realizadas polo Consello de Europa”.

O lema da convocatoria será Emerxencia lingüística. Precisamos do galego, e terá lugar en 7 cidades galegas simultaneamente.

“A evolución dos datos de uso e coñecemento do galego son alarmantes”, afirma o voceiro de Queremos Galego e presidente da Mesa pola Normalización Lingüística, Marcos Maceira. As taxas de incapacidade para falar galego entre a poboación menor de 15 anos son as máis altas da historia, consolídase a ruptura interxeracional e aumenta o número de persoas que se senten na obriga de mudar de lingua. “Perante esta situación, reiterada en inumerábeis ocasións pola plataforma Queremos Galego e confirmada polo Comité de expertos e o Consello de Ministros do Consello de Europa”, recorda Maceira, “a única política da Xunta é a agresividade e, segundo os expertos do Consello de Europa, incumprir a Carta e non realizar ningunha acción lexislativa ou política para o facer, nomeadamente no ámbito do ensino”.

“Se Feixó tivese un mínimo de respecto por Galiza e pola institución que representa”, asegura o voceiro de Queremos Galego, “xa tería derrogado hai anos o decreto contra o galego”. A resposta da sociedade galega continúa activa e de novo co respaldo da máis relevante institución internacional europea para a defensa da democracia e dos dereitos humanos, como é o Consello de Europa.

A plataforma lembra que o informe dos expertos non só afecta á Xunta. O Estado ten que garantir o cumprimento da Carta que el mesmo ratificou, nomeadamente nos ámbitos que son da súa competencia. Neste sentido, a entidade recorda que as dificudades de uso do galego na xustiza ou na administración xeral do Estado deben ser resoltas, comezando por garantir o coñecemento de galego de todo o funcionariado estatal destinado en Galiza.

“A situación é de emerxencia e o galego é necesario para o desenvolvemento cultural, social, económico e humano de Galiza”, recordan: “Precisamos do galego para Galiza existir “.