Alegacións ao orzamento do Concello de Santiago 2013
Denuncia e recollida de sinaturas
ASINA
A Asociación Cultual Musical Solfa, de Compostela, leva máis de 15 anos traballando e realizando diferentes actividades culturais, nomeadamente no campo da música. Impártense clases de diferentes instrumentos, organízanse xornadas, conferencias e campamentos musicais, realízanse diversos concertos en diferentes espazos e lugares de Compostela e tamén por toda a Galiza Ademais da impartición de clases en diferentes instrumentos, forman parte da Asociación unha banda de música e unha coral por máis de 70 persoas.
O Concello de Santiago, até este ano, mantivo un convenio de colaboración coa Asociación Cultural Musical Solfa, o que axudou de xeito determinante realizar unha actividade musical ampla, intensa, diversificada, participativa e frutífera, axudando a dinamizar, sobre todo, o Barrio das Fontiñas
Nos orzamentos do ano 2013, o Alcalde decide anular o convenio coa Asociación Cultural Musical Solfa de xeito unilateral e nega calquera outro tipo de axuda. Esta decisión chama poderosamente a atención cando, nestes mesmos orzamentos, increméntanse as axudas ou mantéñense a outras asociacións, cuxa actividade é escasa ou moi inferior a realizada pola Asociación Cultural Musical Solfa.
Entendemos que esta actuación, do alcalde de Santiago, de non ser modificada, suporía un uso partidario e perverso do diñeiro público e de marxinación de todo o que supón de potenciación da cultura e música galega.
Os abaixo asinantes, por todo o anteriormente exposto, solicitamos que nos orzamentos para ano 2013 se recolla a prórroga do convenio asinado no ano 2012, como única posibilidade de dar continuidade ao labor e as actividades realizadas, nas que teñen participado miles de persoas.
As sinaturas as podedes achegar ao noso correo electrónico solfacompostela@asociacionsolfa.gal ou ben dándonolas o día 20 ás 19.30 no Centro Sociocultural das Fontiñas.