Cargando imaxes...
Asociación Solfa > Coro > Director

Director

David LojoDavid Lojo Ces (1993) trompetista e compositor. Graduado en Jazz pola CODARTS “University of the Arts” (Róterdam, Países Baixos) baixo a supervisión dos trompetistas Jarmo Hoogendijk, Jan van Duikeren, e Wim Both (trompeta lead da WDR Big Band).

Dá os seus primeiros pasos na música aos 8 anos de idade na Banda Municipal de Música de Boiro (A Coruña), da man de D. Ramón Boga. Posteriormente, asiste ao Conservatorio Felipe Paz Carvajal de Noia (A Coruña) onde obtén o Grao Profesional de Música, após recibir clases de mestres como Dalibor Sebestik, Juanma Varela ou Ramón Ces.

É na adolescencia cando descobre o jazz da man do saxofonista grego Thanos Athanasopoulos e do guitarrista galego Marcos Pin. Nesa etapa comeza a asistir a cursos e masterclass con diferentes mestres e músicos de talle internacional como Michael Phillip Mossman, Antonio Hart, Darren Barret, Michel Camilo, Orrin Evans, Walter White…entre outros.

Con 18 anos comeza a estudar no Seminario Permanente de Jazz de Pontevedra (SPJ) onde permanece tres anos cos mestres Paco Charlín e Abe Rábade. Esta experiencia outórgalle a oportunidade de participar en diferentes proxectos e tocar con diversos músicos, así como de experimentar co seu propio son e formar o que sería o seu primeiro cuarteto.

Entre 2019-2023 realiza os seus estudos na CODARTS “University of the Arts” (Róterdam, Países Baixos) onde é alumno de diferentes mestres/músicos como Benjamin Herman, Stefan Lievestro, Salle de Jonge, Hans Mantel ou Frans van Geest. En Róterdam asiste a diferentes masterclass con músicos de grande prestixio internacional como Terence Blanchard, Melissa Aldana, Jeff Ballard, Mark Giuliana ou Chucho Valdés. Ademais, alí complementa a súa formación en Dirección Orquestral cos mestres Joost Geevers, Carlo Balemans e Karel Deseure e en arranxos e Composición Jazz con Robert Koemans e Bernard Van Rossum (BvR Flamenco Big Band).

Durante a súa traxectoria, toca e colabora con numerosos artistas e proxectos como: Nelson Cascais (Jazz no Principal 2014), Pontejazz Big Band (2016), Walter White, Jesús Santandreu, Kyle Poole, Phillip Dizack, Ribeira Sacra Jazz Orquesta, Pablo Sax Trío (Amorgana 2017), Orquesta galega de Liberación, Circo de Nadal (Vigo 2021-2022) ou Miho Hazama and Royal Conservatorie Big Band (como trompeta lead, A Haia 2021). Alén diso, entre os anos 2011 e 2016, exerce como asistente de dirección na Banda Municipal de Música de Boiro, baixo a guía do mestre Juan Lois Diéguez.

Tamén exerce como director da Coral Polifónica da Sociedade Recreativa de San Xoán de Calo (2018-2019), así como de profesor na Escola Municipal de Música de Ames (2017-2018).

Desde 2017 é membro da banda galega de improvisación libre conducida Comando Radar, publicando o seu primeiro traballo discográfico en 2019. É, tamén, líder do seu propio cuarteto de jazz, co que acaba de publicar en 2022 o seu primeiro álbum “Road to Balance” (Camiño do equilibrio).