Pandeireta

Gabi Reboredo comeza a súa andaina na Asociación Cultural Serandeir@s de Boborás aló polo ano 2007 mentres se forma en baile, canto e percusión no Centro de cultura Popular Xaquín Lorenzo e máis na AOFT en Ourense. Continúa en Compostela na ELMPG da Central Folque na modalidade de canto, onde participou na grabación de “Galiza”e Kepa Junquera e mais na orquestra De Cuellas Suite en Irlanda.

É alumno na E-Trad de Vigo desde o 2017 na especialidade de Acordeón Diatónico até hoxe, e continúa a súa formación con Pedro Pascual na escola de Cantigas e Agarimos en Compostela. Asiste de xeito habitual e diferentes obradoiros intensivos de canto, percusións, danza e técnica vocal.

No ano 2016 forma parte do corpo edanza do Etno Portuga,e no 2018, é membro de Schoolhouse Sessions Band en Escocia. Foi integrante de bandas de folque como Ethno Trío e De Cor de Lousa e mais do grupo vocal Pink Roe. Participou como letrista nos discos de Rústica, Lobos e Caldo. Na actualidade é vocalista do dúo Paraíso Canto e é membro da Banda de Sheila Patricia.

Baile tradicional

Roberto Rama Castroagudín. Nace en Calo (concello de Teo) no 1983. Comeza o seu contacto coa música no ano 1995 ingresando na Banda de Música da Sociedade Recreativa de San Xoán de Calo. Dous anos despois tamén formará parte do grupo de baile e da Banda de Gaitas “Estivada” da mesma sociedade.

Comeza os estudos de linguaxe musical e saxofón na Escola de Música da Sociedade Recreativa de San Xoán de Calo da man de Moncho López e máis tarde cursa estudos musicais no Conservatorio Profesional de Música de Arzúa. En referencia á música tradicional, comeza o seu contacto coa gaita e o baile na mesma sociedade, cursando, anos despois, estudos de Historia da Música Galega e de gaita en a Central Folque da man de Ramón Pinheiro e Edelmiro Fernández, respectivamente. Iníciase na música jazz na Escola de Música Creativa DROPS da man de Xoán Leis e na Escola Estudio da man de Suso Atanes.

En 1999 comeza a súa andaina fóra da Sociedade Recreativa de San Xoán de Calo coa agrupación Os Enxebres de Cacheiras, no 2006 funda o grupo folk galego Pradairo, no 2006 comeza como gaiteiro e saxofonista no grupo folk galego Fía na Roca, no 2014 funda o trío musical Puntada sen Fío e xa no 2010 funda o grupo Os d’Abaixo no que se atopa na actualidade.

No verán do 2012 dirixe a Banda de Gaitas “Estivada” da Sociedade Recreativa de San Xoán de Calo, sociedade na que tamén dirixe a banda de música no verán do 2021.

Nesta andaina por diferentes grupos de diferentes estilos musicais participa na gravación de máis dunha ducia de discos. Andaina, na que tamén participa en diferentes certames musicais de especial relevancia por moita xeografia de Europa e América como o Festival Intercéltico de Lorient en sete ocasión con diferentes agrupacións, o Celtic Connections de Glasgow co grupo Fía na Roca, o Festival do Mundo Celta de Ortigueira co grupo Fía na Roca e Os d’Abaixo, o Wackelstein Festival de Austria co grupo Os d’Abaixo. No ano 2008 realiza unha xira por Suramérica co grupo Fía na Roca destacando o concerto no Teatro Solís de Montevideo.

No ano 2022 resulta galardoado nos Premios Martín Códax da Música co grupo Os d’Abaixo, acadando o 1º premio na categoría de folk.