Aberto o prazo de matrícula na Asociación Cultural e Musical de Solfa curso 26/27
A Asociación Cultural Musical Solfa preséntavos a nova proposta de actividades para o curso 2026-2027.
Oferta musical:
- Coro
- Pandeireta
- Baile tradicional
Horarios:
Coral de adultos
Ensaios: Luns e mércores, de 20:00 a 21:30 h.
Pandeireta (tres grupos):
- Iniciación: luns, de 17:00 a 18:00 h.
- Perfeccionamento I: luns, de 18:00 a 19:00 h.
- Perfeccionamento II: luns, de 19:00 a 20:00 h.
Baile tradicional
- Iniciación: mércores, de 18:00 a 19:00 h.
- Perfeccionamento: mércores, de 19:00 a 20:00 h.
Prezos:
- Socios/as: 3 €/mes
- Cada disciplina: 12 €
- As cotas deberán estar domiciliadas
Lugar:
As actividades desenvolveranse no Centro Sociocultural das Fontiñas.
Prazo de matrícula:
Do 14 ao 18 de setembro de 2026.
Teléfono: 676 675 030 (atenderase en horario de 17:00 a 20:00 h.)
Correo electrónico: asociacionsolfa@asociacionsolfa.gal
As persoas xa matriculadas en anos anteriores só teñen que confirmar que continúan.
50 anos do conflito lingüístico. Acto con Francisco Rodríguez
O pasado 10 de marzo cumpríronse 50 anos da publicación do libro Conflito lingüístico e ideoloxía na Galiza, de Francisco Rodríguez, editado por Xistral na súa colección Alexandre Bóveda.
Con este motivo, Galiza Cultura, a Federación de Asociacións Culturais Galegas, organiza un acto no que Francisco Rodríguez pronunciará a conferencia «Normalización versus asimilación: 50 anos do conflito lingüístico».
O acto terá lugar o vindeiro 15 de xullo, ás 19.30 horas, no Espazo Sociocultural Moncho Reboiras (Avenida de Lugo, 219, baixo).
A Asociación Cultural e Musical Solfa forma parte de Galiza Cultura e, como entidade integrante desta federación, participa neste acto e fai un chamamento a todas as socias e socios para que asistan a esta conferencia, que consideramos de especial interese e plena actualidade.
Nun momento no que a nosa lingua sofre continuas agresións e intentos de marxinación e substitución, cremos que é importante reflexionar sobre a súa situación e sobre os retos que temos por diante.
Vídeo do Concerto As Rúas do Vento Ceibe
Gravación en directo do concerto celebrado no Auditorio de Galicia o sábado 30 de maio de 2026
XIII Convivio da Cultura Galega en Santa Isabel, Outeiro de Rei
Un ano máis, a Coral de Solfa participa o sábado, 11 de xullo, na XIII edición do Convivio da Cultura Galega en Outeiro de Rei.
A xornada iniciarase ás 11.15 h na Casa-Museo Manuel María, punto de encontro onde a Coral de Solfa poñerá voz a varios poemas de Manuel María. De alí, ás 11.45 h, sairemos camiñando, ao son das gaitas, cara ao cemiterio, onde levaremos a cabo un pequeno acto en lembranza de Manuel María e de Saleta. A continuación, trasladarémonos ao campo de Santa Isabel.
Xa en Santa Isabel, ao pé do río Miño, e antes do xantar, ás 12.30 h, terá lugar a actuación da Banda de Música Sons e Soños de Rábade, Begonte, Outeiro de Rei e Friol, dirixida por Armando Morales. Nesta ocasión, a banda estará acompañada por Uxía, que, ademais de interpretar unha serie de composicións conxuntamente coa formación, cantará en solitario algunhas pezas do seu último traballo, dedicado a Begoña Caamaño.
A festa continuará pola tarde, ás 16.30 h, cunha foliada conducida por Xurxo Souto, na que non faltará a música de Sons da Chaira, Música na Eira, Mestura de Nete, o grupo de cantos de taberna de Xermolos, Tradivivas Agra e Parabéns.
Concerto final de curso 2026
A Asociación Cultural e Musical Solfa celebrará o luns 22 de xuño o seu Concerto de fin de Curso 2026, coa participación do grupo de baile, o grupo de pandeireteiras e da Coral de Solfa. O concerto terá lugar no Centro Sociocultural das Fontiñas ás 19:00 horas. Como cada ano, esta actuación servirá para compartir co público o traballo realizado ao longo do curso polas diferentes seccións da asociación. A entrada é libre e estades todas e todos convidados a asistir. Este evento conta coa colaboración da Deputación da Coruña.
